ကျွန်တော်တို့တွေ စမတ်ဖုန်းကို အသုံးပြုပြီး ဓာတ်ပုံရိုက်ကူးတဲ့အခါ အမြဲလိုလို ကင်မရာကို Auto Mode မှာထားပြီး သူ့အလိုအလျောက်ချိန်ညှိပေးတဲ့ Setting တွေအတိုင်း ရိုက်ကူးလိုက်ကြတာ များပါတယ်။ နောက်ပြီး ဒီလိုရိုက်ကူးပေးလို့ ရလာတဲ့ ပုံတွေကိုလည်း စိတ်ကျေနပ်စွာ လက်ခံကြတာများပါတယ်။ တခါတခါမှာတော့ HDR Mode နဲ့ Flash မီး ကိုတော့ ကိုယ်တိုင်ဖွင့်ပိတ် ရိုက်ကူးလေ့ရှိကြပါတယ်။ ဒါပေမယ့် ဖုန်းအားလုံးနီးပါးမှာ Flash မီးဟာလည်း Auto အဖွင့်အပိတ်လုပ်ပေးပြီး အခုနောက်ပိုင်း မော်ဒယ်မြင့် ဖုန်းတွေမှာ HDR ကိုလည်း အလိုအလျောက် အဖွင့်အပိတ်ပြုလုပ်ပေးလာနိုင်ပြီးဖြစ်လို့ ကိုယ်တိုင် အဖွင့်အပိတ်လုပ်ဖို့ မလိုအပ်တော့လောက်အောင် အဆင်ပြေလာတာတွေ့ရပါတယ်။
အခုနောက်ပိုင်း ထွက်ပေါ်လာတဲ့ စမတ်ဖုန်းအများစုမှာ Professional ဒါမှမဟုတ် Manual လို့ခေါ်တဲ့ Mode တစ်ခုပါဝင်လာပါတယ်။ ဖုန်းထုတ်လုပ်တဲ့ Company နဲ့ Camera Application ပေါ်မူတည်ပြီး အခေါ်အဝေါ်ကွာခြားသွားတာ ဖြစ်ပါတယ်။ Samsung ဖုန်းတွေမှာတော့ Pro Mode လို့ ခေါ်ပါတယ်။ ဒီ Mode မှာ မတူညီတဲ့ Setting တွေ အတိုင်းအတာတွေအားလုံးနီးပါးကို မိမိစိတ်ကြိုက် လိုချင်တဲ့ ပုံစံရအောင် ချိန်ညှိရိုက်ကူးနိုင်မှာဖြစ်ပါတယ်။ ဒါ့အပြင် Camera App နဲ့ ထုတ်လုပ်ပေးတဲ့ ဖုန်း Model၊ ထုတ်လုပ်ပေးတဲ့ Company Brand ပေါ်မူတည်ပြီး RAW Format နဲ့ ရိုက်ကူးသိမ်းဆည်းပေးနိုင်တာတွေလည်း ပါဝင်လာပြီ ဖြစ်ပါတယ်။
ဒီ Manual Mode ဟာ ကင်မရာ App တွေနဲ့ ဖုန်းထုတ်လုပ်တဲ့ ကုမ္ပဏီတွေပေါ်မူတည်ပြီး Setting နေရာနဲ့ အခေါ်အဝေါ်တချို့ ကွဲပြားပေမယ့် တခြား Mode တွေဖြစ်တဲ့ Slow-mo၊ Timelapse နဲ့ Panorama တို့လိုမျိုး Mode တွေနဲ့ အတူတွေ့ရနိုင်ပါတယ်။ Manual Mode ကို ရွေးချယ်ပြီးပါက ချိန်ညှိစရာ Setting တွေ ပြသပေးမှာဖြစ်ပြီး စိတ်ကြိုက် ချိန်ညှိရိုက်ကူးနိုင်မှာဖြစ်ပါတယ်။
Metering Mode
ပုံကောင်းတစ်ပုံရရှိဖို့ အရေးကြီးတဲ့ အချက်တွေထဲကတစ်ခုကတော့ မှန်ကန်တဲ့ အလင်းပမာဏကို ရရှိဖို့ ဖြစ်ပါတယ်။ မီးအလင်း ခပ်မှိန်မှိန် ထွန်းထားတဲ့ အခန်းထဲမှာ ဓာတ်ပုံရိုက်တာနဲ့ နေသာနေချိန် အပြင်ဘက် ရှုခင်းပုံရိုက်တာဟာ အများကြီး ကွာခြားပါတယ်။ ISO Setting ကို ကောင်းမွန်တဲ့ အတိုင်းအတာရရှိအောင် ချိန်ညှိဖို့နဲ့ Shutter Speed ကို ချိန်ညှိဖို့အတွက် ကင်မရာဟာ အလင်းပမာဏကို တိုင်းတာရပါတယ်။ ဒီလိုတိုင်းတာဖို့ Matrix ၊ Center နဲ့ Spot စတဲ့ တိုင်းတာနည်း မျိုးစုံထဲက တစ်ခုကို အသုံးပြုပြီး တိုင်းတာရပါတယ်။
Matrix Metering ဆိုတာကတော့ Frame အတွင်း နေရာစုံက ယေဘုယျ အလင်းပမာဏကို ယူပြီး တိုင်းတာတာ ဖြစ်ပါတယ်။ Center Mode ဟာ Matrix နဲ့ ဆင်တူပေမယ့် အလည်ဗဟိုပိုင်းမှာရှိတဲ့ နေရာကို အဓိကထားယူပြီး တိုင်းတာတာဖြစ်ပါတယ်။ Spot Mode ကတော့ Frame ရဲ့ အလည်ဗဟိုက သေးငယ်တဲ့ Spot လေးတစ်ခုရဲ့ အလင်းပမာဏကိုပဲ ရယူပြီး တိုင်းတာတာဖြစ်ပါတယ်။ တချို့ ကင်မရာ App တွေကတော့ လက်နဲ့ ထိတွေ့ပြီး မိမိတိုင်းတာလိုတဲ့ နေရာက အလင်းပမာဏကို တိုင်းတာလို့ရတဲ့ Touch Metering Mode ကိုပါ ထည့်သွင်းပေးထားတာ တွေ့ရပါတယ်။
ကောင်းမွန်စွာ အလင်းမရရှိတဲ့ အခြေအနေမှာ Metering Mode ကို ရွေးချယ်အသုံးပြုနိုင်တာဟာ အရေးကြီးပါတယ်။ မီးလုံးတို့ နေတို့လိုမျိုး အလင်းများတဲ့ အရာတွေ ပါဝင်တဲ့အခြေအနေ ဒါမှမဟုတ် အရိပ်တွေ တော်တေ်ာများများပါလို့ အလင်းအားနည်းလွန်းနေတဲ့ အခြေအနေတွေမှာ အလင်းကို မှန်ကန်စွာ တိုင်းတာနိုင်ဖို့ ခက်ခဲတတ်တာကြောင့် ဓာတ်ပုံအတွက် မှန်ကန်တဲ့ Exposure ကို တွက်ချက်ပေးနိုင်ဖို့ ခဲ့ယဉ်းပါတယ်။
ISO Speed
ဓာတ်ပုံကို ဖလင်နဲ့ ရိုက်ကူးကြစဉ်အချိန်က Film ကနေ အလင်းကို ဘယ်လိုအမြန်နှုန်းနဲ့ တုန့်ပြန်သလဲဆိုတာ အရေးကြီးတဲ့ အချက်ဖြစ်ခဲ့ပါတယ်။ ဖလင်ဟာ အလင်းကို ပိုမို အာရုံခံစားနိုင်လေ ဓာတ်ပုံကို ရိုက်ကူးဖို့ လိုအပ်တဲ့ အလင်းပမဏ အနည်းငယ်ကိုသာ လိုအပ်လေ ဖြစ်ပါတယ်။ ဒါကိုရဖို့ Aperture နဲ့ Shutter Speed ကို လိုအပ်သလို ပြောင်းလဲရပါတယ်။ လွန်ခဲ့တဲ့ နှစ်တွေဆီက ဖလင်ရဲ့ အာရုံခံစားနိုင်မှုကို တိုင်းတာဖို့ စံသတ်မှတ်ချက် မျိုးစုံ ရှိခဲ့ပါတယ်။ ၁၉၇၀ ခုနှစ်မှာတော့ International Organization for Standardization (IOS) ကနေ Scale တစ်ခုကို ဖန်တီးခဲ့ပြီး အဲ့ဒါကို ယခုအချိန်ထိ အသုံးပြုနေကြဆဲ ဖြစ်ပါတယ်။ ISO Scale ဟာ logarithm နည်းကျ တွက်ချက်တာဖြစ်ပြီး ISO 200 ဟာ ISO 100 ထက် အာရုံခံစားနိုင်မှု နှစ်ဆရှိပါတယ်။ အဲ့ဒီလိုပဲ ISO 400 ဟာ ISO 200 ရဲ့ အာရုံခံစားနိုင်မှုထက် ၂ဆ ပိုများပါတယ်။
Shutter Speed
SLR နဲ့ DSLR လိုမျိုး ဓာတ်ပုံကင်မရာတွေမှာ အဖွင့်အပိတ်တကယ်လုပ်ပေးတဲ့ Shutter တစ်ခု ပါဝင်ပါတယ်။ ဒီ Shutter ဟာ များသောအားဖြင့် တစက္ကန့်ထက် လျော့နည်းတဲ့ အချိန်အတိုင်းအတာတခုအတွင်းမျှ ဖွင့်လှစ်ပေးပြီးတော့ ဖင်လင်ဆီကို အလင်းရောင် ရောက်ရှိအောင် လုပ်ဆောင်ပေးပါတယ်။ အဲ့ဒီနောက် အလင်းရောင်တွေအများကြီး ဝင်လာပြီး ဓာတ်ပုံပျက်စီးမသွားအောင် Shutter ကိုပြန်ပိတ်လိုက်ပါတယ်။ ဒီ Shutter ဖွင့်ချိန်နဲ့ ပိတ်ချိန်ကြား ကြာချိန်ဟာ ရိုက်ကူးမယ့်ပုံရိပ်အခြေအနေအပေါ်မူတည်ပြီး ချိန်ညှိရိုက်ကူးရတာဖြစ်လို့ တခုနဲ့ တခု မတူညီကြပါဘူး။ များသောအားဖြင့် တစက္ကန့်ထက်လျော့နည်းတဲ့ အချိန်အပိုင်းအခြားလေးအတွင်း (ဥပမာ ¼, 1/160, 1/12500 စက္ကန့် စသည်ဖြင့်) မှာပဲ ထားရှိရိုက်ကူးဖို့လိုအပ်တတ်ပါတယ်။
စမတ်ဖုန်းကင်မရာတွေမှာတော့ အလားတူပုံစံရအောင် Sensor ကရရှိလာတဲ့ ပုံရိပ်ဒေတာတွေကို လိုအပ်တဲ့ အချိန်အပိုင်းအခြားလေးအထိပဲ ဖမ်းယူသိမ်းဆည်းခြင်းဖြင့် လုပ်ဆောင်ကြပါတယ်။ စမတ်ဖုန်းကင်မရာတွေမှာ အလင်းရောင်ဟာ မှန်ဘီလူးဆီ အမြဲရောက်ရှိနေတာဖြစ်ပြီး ပုံရိပ်ဒေတာတွေကိုတော့ ရိုက်ကူးမှသာ ဖမ်းယူသိမ်းဆည်းတာဖြစ်ပါတယ်။ အလင်းအားနည်းချိန်မှာ Shutter ကို အချိန်ကြာကြာ ဖွင့်လှစ်ပေးထားဖို့ လိုအပ်ပြီး အလင်းရောင်များတဲ့ အချိန်တွေမှာတော့ Shutter ကို မြန်မြန်ဖွင့်လှစ်ပြီး မြန်မြန် ပိတ်ဖို့ လိုအပ်ပါတယ်။
ဒါ့အပြင် Shutter Speed အပြောင်းအလဲပြုလုပ်ခြင်းဖြင့် ရရှိလာနိုင်တဲ့ အကျိုးတွေ ရှိပါတယ်။ ဥပမာ စီးဆင်းနေတဲ့ ရေတွေကို ရိုက်တာနဲ့ ကားမီးတွေကို ညအချိန် ရိုက်ကူးတဲ့အခါ Motion Blur Effect ရရှိအောင် Slow Shutter ကို အသုံးပြုပြီး ရိုက်ကူးနိုင်ပါတယ်။ လျှင်မြန်စွာရွှေ့လျားနေတဲ့ အရာဝတ္တုတွေ (ဥပမာ အားကာစားလုပ်နေတာတွေ) ကိုတော့ Fast Shutter Speed ကို အသုံးပြုပြီး ရိုက်ကူးတာက ပိုမိုအဆင်ပြေစေပါတယ်။ Slow Shutter Speed နဲ့ရိုက်ကူးတဲ့အခါမှာ ကင်မရာဟာ လှုပ်ရှားသွားဖို့ ဖြစ်ပေါ်နိုင်တာကြောင့် မလိုလားအပ်တဲ့ ပုံရိပ်တွေ ရရှိလာနိုင်ပါတယ်။ ဒါကြောင့်လည်း ဒီပြဿနာကို ဖြေရှင်းဖို့ စမတ်ဖုန်းအများစုမှာ OIS (Optical Image Stabilization) ကို ထည့်သွင်းလာကြပါတယ်။ Slow Shutter Speed ကို အချိန်ကြာကြာထားရှိရိုက်ကူးမယ်ဆိုရင်တော့ Tripod လိုမျိုး အသုံးပြုပြီး ရိုက်ကူးဖို့ အကြံပြုချင်ပါတယ်။
Focus
အလင်းရောင်ဟာ ကင်မရာထဲမှာရှိတဲ့ မှန်ဘီးလူးကို ဖြတ်သန်းသွားတဲ့အခါ မှန်ဘီလူးရဲ့မျက်နှာပြင်တစ်ခုလုံးကနေ ဖောက်ထွက်သွားတဲ့အတွက် အလင်းယိုင်ခြင်းကို ဖြစ်စေပါတယ်။ ကင်မရာကနေ ထွက်လာတဲ့အခါမှာ အဲ့ဒီအလင်းတွေဟာ စတင်စုစည်းလာပြီး တနေရာမှာ ဒီအလင်းတွေ ဆုံတွေ့ကြတဲ့ အမှတ်လေး ဖြစ်ပေါ်လာပါတယ်။ ဒီအမှတ်ကို Focal Point လို့ ခေါ်ပါတယ်။ ဒီနေရာမှာ ပုံရိပ်ဟာ အကြည်လင်ဆုံး ဖြစ်ပါတယ်။ မှန်ဘီလူးကို အနည်းငယ်ရွှေ့လျားစေခြင်းအားဖြင့် ဒီ Focal Point ကို ချိန်ညှိ ပြောင်းလဲနိုင်ပါတယ်။ ကင်မရာအများစုရဲ့ Manual Mode မှာ Focus ကို စိတ်ကြိုက် ချိန်ညှိနိုင်ဖို့ ပြုလုပ်ပေးထားကြပါတယ်။
White Balance
အရာဝတ္တုတခုရဲ့ အရောင်ကို သူ့ကိုပေးထားတဲ့ အလင်းရောင်ရဲ့အခြေအနေပေါ်မူတည်ပြီး တိုင်းတာလေ့ ရှိပါတယ်။ အရာဝတ္တုတခုဟာ နေရောင်အောက်မှာကြည့်ရင် ဖြူတယ်လို့ ထင်ရပေမယ့် ဖယောင်းတိုင်မီးရောင်အောက် ဒါမှမဟုတ် တိမ်ထူနေတဲ့ နေရောင်အောက်မှာတော့ အရောင်ပြောင်းသွားတတ်ပါတယ်။ ဖရောင်းတိုင်မီးနဲ့ မာကျူရီမီးလုံးတွေရဲ့ အရောင်ဟာ အလင်းရဲ့ ရောင်စဉ်တန်းမှာ ပိုနွေးတဲ့ အစွန်ဆုံးဖက်ရှိနေလို့ အနီရောင်သမ်းနေတယ်လို့ ပြောလို့ရပါတယ်။ ဒါကို အစားထိုးဖို့ White Balance Setting မှာ Color Temperature ကို အပြာရောင်ဘက်ကို တိုးမြှင့်ပြောင်းလဲပေးပြီး အဖြူရောင်တွေကို ချိန်ညှိရပါတယ်။ အခြားတဖက်မှာတော့ ကင်မရာဟာ Color Temperature ကို အနီဘက် တိုးမြှင့်ပြီး ဆန့်ကျင်ဘက် ပြုလုပ်ပါတယ်။ ဒီနည်းအားဖြင့် ပတ်ဝန်းကျင်က အလင်းရောင်ရဲ့ အခြေအနေကြောင့် အရောင်တွေပုံမှန်မဟုတ်ဘဲ ပြောင်းလဲသွားတာကို ချိန်ညှိရပါတယ်။ White Balance ဆိုတဲ့အတိုင်း အဖြူရောင်အပေါ်အခြေခံပြီး ချိန်ညှိတာတွေ ပြုလုပ်တာဖြစ်ပါတယ်။ အဖြူရောင်ပေါ် အနီအလင်းကျနေမယ်ဆိုရင် White Balance မှာ အပြာရောင်ကို တိုးမြှင့်ပေးခြင်းအားဖြင့် မှန်ကန်တိကျတဲ့ အဖြူကို ရရှိမှာဖြစ်ပါတယ်။ ဒီနည်းအားဖြင့် တခြားအရောင်တွေဟာလည်း မှန်ကန်တဲ့ အရောင်ကို ရရှိစေမှာပါ။ White Balance ကို Auto မှာထားလိုက်မယ်ဆိုရင် ကင်မရာဟာ Color Temperature ကို ခြုံငုံရယူပြီး မှန်ကန်တဲ့ White Balance ရရှိအောင် ချိန်ညှိပေးမှာဖြစ်ပါတယ်။ White Balance ကို Manual ချိန်ညှိမယ်ဆိုပါက Cloudy၊ Sunny၊ Flourescent Light နဲ့ Incandescent Light လိုမျိုး Preset တွေကို ရွေးချယ်နိုင်သလို တချို့ကင်မရာတွေမှာတော့ Kelvin နဲ့ ချိန်ညှိနိုင်ပါတယ်။
EV Compensation
ဒီ Setting ကတော့ ဓာတ်ပုံတပုံအတွက် တွက်ချက်ထားပြီးသား Exposure ကို Override လုပ်ပြင်ဆင်ဖို့အတွက် အသုံးပြုနိုင်ပါတယ်။ Camera App အနေနဲ့ ISO နဲ့ Shutter Speed တို့ကို ချိန်ညှိရင်း Exposure ကို တိုင်းတာတွက်ချက်မှာဖြစ်ပါတယ်။ ဒီ Exposure ကို EV Setting ကနေ ပြောင်းလဲ ချိန်ညှိနိုင်ပါတယ်။ EV Setting မှာ +1 တိုးတာဟာ လက်ရှိ Exposure ကို နှစ်ဆတိုးလိုက်မှာဖြစ်ပြီး -1 ကတော့ လက်ရှိရဲ့ တဝက်ထိ လျော့ချလိုက်မှာ ဖြစ်ပါတယ်။ မတူညီတဲ့ Exposure တွေနဲ့ ဓာတ်ပုံတွေကို ရိုက်ကူးတာဟာ HDR ရဲ့ အခြေခံပဲ ဖြစ်ပါတယ်။ Tripod ကို အသုံးပြုပြီး ဓာတ်ပုံတစ်ခုတည်းကို မတူညီတဲ့ Exposure Setting တွေနဲ့ အကြိမ်ကြိမ်ရိုက်ကူးပြီး ဒီပုံတွေကို ပေါင်းစပ်လိုက်ခြင်းအားဖြင့် ကောင်းမွန်တဲ့ HDR ဓာတ်ပုံတပုံကို ရရှိနိုင်မှာ ဖြစ်ပါတယ်။
တချို့ App တွေမှာ EV bracketing ဆိုတဲ့ Mode ပါဝင်ပြီး မတူညီတဲ့ EV level နဲ့ ပုံတွေကို အလိုအလျောက်ရိုက်ကူးပေးမှာ ဖြစ်ပါတယ်။
Aperture
Smartphone တွေမှာ Aperture ဟာ အသေဖြစ်ပြီး ပြောင်းလဲလို့ မရပါဘူး။ ဒါပေမယ့် ကိုယ့်ရဲ့ ဖုန်းမှာရှိတဲ့ Aperture ဟာ ဘယ်လိုအလုပ်လုပ်လဲဆိုတာသိရင်လည်း ဓာတ်ပုံရိုက်ကူးရာမှာ အထောက်အကူဖြစ်စေပါတယ်။ Aperture ဆိုတာ အလင်းကို Sensor ဆီသွားဖို့ ပြုလုပ်ထားတဲ့ အပေါက်ရဲ့ အရွယ်အစားဖြစ်ပါတယ်။ အလင်းဝင်ပေါက်ရဲ့ အရွယ်အစားသေးလေ Sensor ပေါ်ကျရောက်တဲ့ အလင်းရောင်အရနည်းလေဖြစ်ပြီး အလင်းဝင်ပေါက်ရဲ့ အရွယ်အစားကြီးလေ အလင်းပိုရလေဖြစ်ပါတယ်။ ပိုကျယ်တဲ့ Aperture ပါဝင်တဲ့ (ဥပမာ – f/1.7) မှန်ဘီလူးနဲ့ ကင်မရာတွေဟာ အလင်းအားနေချိန်မှာတောင် ပိုကောင်းတဲ့ ပုံရိပ်တွေကို ရိုက်ကူးပေးနိုင်ပါတယ်။
Practice
မိမိကင်မရာရဲ့ Manual Mode ကနေ ကောင်းမွန်တဲ့ ဓာတ်ပုံတွေကို ရရှိဖို့ကတော့ လေ့ကျင့်ယူရမှာ ဖြစ်ပါတယ်။ ဒါပေမယ့် ဒီ Manual Control တွေအားလုံးကို တပြိုင်နက်တည်း အသုံးမပြုဖို့တော့ အကြံပေးချင်ပါတယ်။ Setting အသီးသီးဟာ ပုံမှန်အနေအထားကို အလိုအလျောက် ပြောင်းလဲသွားမှာဖြစ်လို့ ကိုယ်ချိန်ညှိချင်တဲ့ Setting ကိုပဲ ချိန်ညှိရိုက်ကူးနိုင်ပါတယ်။ ပထမဆုံးအနေနဲ့ Shutter Speed ကို အမျိုးမျိုးပြောင်းလဲပြီး စီးဆင်းနေတဲ့ ရေတွေကို ရိုက်ကူးတာ၊ အလျင်အမြန်ရွေ့လျားနေတဲ့ အရာဝတ္တုတွေကို ရိုက်ကူးတာမျိုးတွေ နဲ့ စမ်းသပ်သင့်ပါတယ်။ Long Exposure ကို အသုံးပြုပြီး ညအချိန် Light Trails တွေကို ရိုက်ကူးတာမျိုးတွေကိုလည်း စမ်းသပ်ရိုက်ကူးကြည့်သင့်ပါတယ်။ ဒါပေမယ့် ဒီလို Long Exposure တွေရိုက်ကူးရာမှာ Tripod အသုံးပြုပြီးတော့မှပဲ ရိုက်ကူးသင့်ပါတယ်။
အဲ့ဒီနောက်မှာတော့ မြင်ကွင်းတခုကို EV Setting အမျိုးမျိုးပြောင်းလဲ ရိုက်ကူးပြီး နောက် Snapseed လိုမျိုး App တွေနဲ့ ရိုက်ကူးထားတဲ့ ပုံတွေကို ပေါင်းစပ်ပြီး HDR ပုံတွေလည်း ရိုက်ကူးစမ်းသပ်နိုင်ပါတယ်။ ဒီလိုမျိုး တဖြည်းဖြည်း သင်ယူခြင်းအားဖြင့် ဘယ်လိုအချိန်မှာ ဘာကို ချိန်ညှိရမယ်ဆိုတာ နားလည်လာပြီး Auto Mode မှာထားရှိပြီး ရိုက်ကူးတာထက် ပိုကောင်းတဲ့ ဓာတ်ပုံတွေကို ရိုက်ကူးလာနိုင်မှာ ဖြစ်ပါတယ်။
စမတ်ဖုန်းသုံးစွဲသူ အားလုံးနီးပါးဟာ ဓာတ်ပုံတွေကို Auto Mode မှာပဲ ထားရှိရိုက်ကူးတတ်ကြပါတယ်။ ဒါပေမယ့် တချို့သော အခြေအနေတွေမှာ Manual Mode ကို အသုံးပြုပြီး စွဲဆောင်မှုရှိပြီး ထူးခြားတဲ့ ဓာတ်ပုံလှလှလေးတွေကို ဖန်တီးရိုက်ကူးနိုင်မှာ ဖြစ်ပါတယ်။ ဒါ့အပြင် DSLR Camera လိုမျိုး ကင်မရာတွေနဲ့ ရိုက်ကူးဖို့အတွက်လည်း အခြေခံတွေကို နားလည်နေပြီးဖြစ်လို့ အထောက်အကူဖြစ်စေမှာပါ။ နောက်ပြီး Auto Mode မှာ ဘယ်လိုမှ ရိုက်ကူးဖို့မဖြစ်နိုင်တဲ့ ဓာတ်ပုံတွေကိုလည်း ရိုက်ကူးနိုင်မှာ ဖြစ်ပါတယ်။
